Opon01

Opon gahapon – Opon ba gihapon?

Baliktan-aw ni: Eugene S. Espedido

Pista na pud!!!!

Bulan na usab sa Oktubre ug nagsugod na ang atong pagpangandam alang sa atong tinuig nga pangilin ug pagsaulog sa kapistahan sunod bulan sa Novembre sa atong mahal nga Patrona ang atong mahal nga senora Birhen sa Regla. Apan nganong sa “REGLA” man? Sa akong pagbasabasa sa kaagi sa larawan sa atong mahal nga senora wala kaayo mapaklaro kon unsay nagpaluyo nga hinungdan kon ngano nga birhen sa Regla ang gihatag nga ngalan. Ang pulong nga REGLA maoy pinulongan nga kinatsila nga sa ato pa “lagda” nga ipatuman sa usa ka panaghugpong o pangagamhanan. Nasayod kita nga ang mga lagda gipakanaug sa mga labaw nga pamuno, hari o “REY” niadtong mga nasud nga gipadagan ug mga hari. Mao man gali nga aduna kitay mga “REGLAmento” kay ang matag kapunongan o ang mga hari man maoy magbuot ug momando sa iyang mga sakop aron ipatuman ang mga REGLA o REGLAMENTO. Ang pulong nga REGLA diay usa ka kamanduan. Maayo unta kon adunay maka hatag ug dugang nga pamahayag niini. Apan sa akong paminaw adunay duruha ka kalagmitan nga tingali mao’y hinungdan sa atong pagtawag kaniya ug Birhen sa Regla.

Una mao ang pagsagop ni San Agustine sa balaan nga larawan sa atong mahal nga Birhen ug ang pagsugod sa pag debosion niini. Si San Agustine nga moy Obispo sa Hippo, Northern Africa niadtong panahuna nagmando nga ipabutang gayod ang balaan nga larawan sa iyang Oratoryo ug maoy hinungdan nga bisan human sa iyang kamatayon ang balaang larawan gitaguan ug giampingan gayud sa iyang mga sakop nga mga mongha sa uban nga kaparian nga Agustinos didto sa Espana. Tingali mao kini ang REGLA sa mga pari Agustinos.

Ikaduha – sa karaan nga panahon didto sa Espana, tungod sa iyang dako nga gugma ug pagtuo sa Mahal nga Birhen, tingali adunay usa ka kamanduan o REGLA nga gipatuman ang ilang Hari diin ang tanan nga barko ug sakyanan sa kadagatan nga buot mo biya sa bisag diin nga pantalan o puerto sa Cadiz, Espana kinahanglan nga manamilit ug mangalyupo sa atong inahan nga Birhen Maria alang sa usa ka luwas ug hapsay nga pagpanaw. Sa dugay nga panahon ang mga marinero ug mga kapitan sa mga barko mitamod niining dalaygon nga REGLA.

Maoy katarungan nga bisag ang atong karaan nga simbahan nagbutang giud ug imahe nga nag atubang sa dagat aron paghatag sa mga marinero ug igong kadasig nga mopadayon sa usa ka luwas ug malinawon nga panaw. Karon ato gihapon nga makita ang mas daku nga imahe kon intandi sa karaan apan sa mao gihapon nga butanganan daw nagbarug ug nagbantay sa kadagatan sa Maktan. Gali kaniadtong nagtubo pa ako diha sa tulay kanunay nako nga madunggan ang mga barko nga mopatingog sa ilang mga bosina matag higayon nga sila molabay atubangan sa simbahan agi ug pagyukbo sa Reyna sa Kadagatan. Apan tingali pud kay wala na masuhito ang mga bag-ong marinero sa REGLA nga kaniadto mao ang gisubay nag anam na ug kawagtang kining usa ka dalaygon nga batasan – ang pagyukbo sa atong Bituon sa Kabuntagon.

Ug buot subayon ang atong pagdevoto sa atong Mahal nga Birhen sa Regla dinhi lang sa Opon mokabat na ug 269 ka tuig kon ato lang itandi sa pagtudlo sa unang Kura Paroko niadtong tuig 1735. Sulod sa maong panahon walay paghupas ang pagtuo ug pagsalig sa mga lumolupyo sa Opon sa iyang pagka matinabangon. Mao bitaw nga ang lumad nga taga Opon modangup gayod pagbalik sa iyang panalipod sa higayon nga ang tao hadlaon na sa kalisod ug kakuyaw.

Tingali dili daghan ang nahibalo nga ang kapistahan sa atong Mahal nga Birhen sa Regla gisaulog usab didto sa America. Ang kapunongan sa mga Oponganon SA America (OSA) nagka sabot nga sulod sa siyan (9) ka Dominggo una moabot ang Noviembre 21 ang imahe sa mahal nga Birhen ilang isuroy sa nagkalainlaing panimalay sa mga taga Lapulapu ug didto ilang pagahimuon ang novena. Kompleto ang ilang tulumanon ug inig kanta na giud sa Gozos mura gayud ug naa ka sa simbahan sa Opon. Malimot ka nga tua na diay ikaw sa laing nasud. Daghan ang mga taga Opon nga manambong abi giud nimo ug nauli kana. Busa sa sunod nimong pag biyahe sa America labi na ug naa ka dapit sa Los Angeles paninguhaa nga makatambong ka. Usa ka talagsaon nga kasinatian ang pag hinumdum sa mahal nga Birhen didto sa halayo nga dapit.

Kini nagmatuod lamang ug unsa ka laum ug kahugot ang atong pagsalig ug pagtuo sa atong inahan sa Opon. Bisag hain ka pa ipadpad sa kapalaran ug bisan unsa pay atong kahimtang sa kinabuhi ang atong gugma magpabilin nga kanunayon kay sumala sa iyang Gozos, ang atong Mahal nga Birhen “sa magsasakay dung-guanan.”

Maayong Pyista kanatong tanan!!!